सुनसरीमा भएको सवारी दुर्घटनामा परी १ जनाको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका अनुसार सुनसरीको कोसी गाउँपालिका २ मा तत्काल नम्बर नखुलेको सवारी साधनले मोटरसाइकललाई ठक्कर दिँदा मोटरसाइकल चालकको मृत्यु भएको छ ।
लौकही–मधुवनी भित्री सडक खण्डमा दक्षिणतर्फ आउँदै गरेको को ३६ प ४०२७ नम्बरको मोटरसाइकललाई मङ्गलबार दिउँसो ३ बजेतिर नम्बर नखुलेको सवारी साधनले ठक्कर दिएको थियो ।
दुर्घटनामा परेर मोटरसाइकल चालक सोही ठाउँका ४० वर्षीय मनोज यादवको मृत्यु भएको प्रहरीले जनाएको छ । गम्भीर घाइते भएका उनको उपचारका क्रममा जिल्ला अस्पताल इनरुवामा मृत्यु भएको हो ।
प्रहरीले दुर्घटना गराएको आशङ्कामा को २ त ९९६७ नम्बरको ट्याक्टर र को १ ह ७३६६ नम्बरको सिटी सफारीलाई नियन्त्रणमा लिएर घटनाको अनुसन्धान थालेको थियो । दुर्घटना ट्याक्टरले गराएको खुलेको छ ।
दुर्घटना गराएको खुलेपछि ट्याक्टर र चालकलाई प्रहरी नियन्त्रणमै राखिएको छ । ट्याक्टरका चालक कोसी गाउँपालिका १ का १८ वर्षीय जितेन यादवसँग सवारी चालक अनुमति पत्र समेत नभएको पाइएको प्रहरीले जनाएको छ ।
