बराहक्षेत्र – बराहक्षेत्र नगरपालिकाले व्यवसायिक कृषकहरूको उत्पादन छिटो र सजिलै बजारसम्म पुगोस् भन्ने उद्देश्यले ५० प्रतिशत अनुदानमा विद्युतीय दुवानी साधन वितरण गरेको छ।
बराहक्षेत्र नगरपालिकाको कृषि विकास शाखाले आर्थिक वर्ष २०८१/८२ को कार्यक्रम अन्तर्गत चार वटा विद्युतीय दुवानी साधन वितरण गरेको हो। कार्यक्रममा प्रति कृषकले रु २ लाख १० हजार लगानी गरेका थिए भने बाँकी लागत नगरपालिकाले व्यहोरेको कृषि बिकास शाखा प्रमुख तुलसा लिम्बूले जानकारी दिइन्।
उनका अनुसार प्रति गोटा साधनको कुल लागत रु ४ लाख २० हजार रहेको छ। प्रतियोगितात्मक प्रक्रियाबाट खरिद गरिएका यी साधनले खेत–बारीमा उत्पादन भएका तरकारी तथा फलफूललाई छिटो र सजिलै बजारसम्म पुर्याउन सहयोग पुग्ने उनले बताइन्।
विद्युतीय दुवानी साधन प्राप्त गर्नेमा बिष्ट कृषि फार्म, नवदुर्गा कृषि सहकारी संस्था, दाजुभाइ कृषि फार्म र पृतिचन माझीलाई उप प्रमुख नन्द कुमारी सुनुवार , प्रमुख प्रशासकीय अधिकृत गणेश बहादुर कटुवाल आर्थिक बिकास संयोजक तेजबहादुर गुरुङ लगायतले हस्तान्तरण गरेका थिए ।
कृषि शाखा प्रमुख लिम्बूका अनुसार यस्ता उपकरणले कृषकको श्रम र समय दुवै बचत हुनुका साथै उत्पादनको मूल्य संरक्षण र बजार व्यवस्थापनमा समेत सहयोग पुग्ने अपेक्षा गरिएको छ।
