बराहक्षेत्र — सुनसरीको बराहक्षेत्र नगरपालिका–६ मुनाल चोकमा लागू औषध ब्राउन सुगरसहित चार जनालाई प्रहरीले पक्राउ गरेको छ।
गोप्य सूचनाको आधारमा इलाका प्रहरी कार्यालय महेन्द्रनगरबाट प्र.स.नि. हर्कराज राईको नेतृत्वमा खटिएको प्रहरी टोलीले सोमबार राति ८:२० बजे उनीहरूलाई लागू औषधसहित पक्राउ गरेको हो।
पक्राउ परेका व्यक्तिहरूको साथबाट प्लेटमा राखेर प्रयोग गरिरहेको अवस्थामा ब्राउन सुगर जस्तो देखिने पदार्थ तौल गर्दा प्लास्टिकसहित ६४० मिलिग्राम र प्लास्टिकबाहेक ४०० मिलिग्राम बरामद भएको प्रहरीले जनाएको छ।
पक्राउ पर्नेहरूमा बराहक्षेत्र–६ निवासी २० वर्षीया रोसिता गिरी बराहक्षेत्र–९ निवासी २० वर्षीया रस्मिता राई इटहरी उपमहानगरपालिका–३ निवासी २२ वर्षीय समित राई इटहरी उपमहानगरपालिका–५ निवासी २० वर्षीय प्रसाङ ढकाल रहेको इलाका प्रमुख दिवस कुवरले बताए ।
उनीहरूलाई इलाका प्रहरी कार्यालय महेन्द्रनगरमा राखी थप अनुसन्धान भइरहेको प्रहरीले जनाएको छ।
