सुनसरीको बराहक्षेत्र नगरपालिका–५ स्थित अमहा सामुदायिक वन क्षेत्रबाट १९ केजी लागू औषध गाँजासहित एक युवकलाई प्रहरीले पक्राउ गरेको छ।
धरान–कालाबञ्जार सडकखण्डमा धरानबाट कालाबञ्जारतर्फ मोटरसाइकलमा शंकास्पद झोला बोकी लागुऔषध बोकेको सूचना पाएपछि ईलाका प्रहरी कार्यालय महेन्द्रनगरबाट खटिएको प्रहरी टोलीले उक्त स्थानमा निगरानी राखेको ईलाका प्रहरी प्रमुख दिवस कुवरले बताए ।
प्र.स.नि. डम्मर बहादुर गौतमको कमाण्डमा खटिएको प्रहरी टोलीलाई देख्नेबित्तिकै दुईजना व्यक्तिहरूले प्रदेश १–०२–०५१ प ४८२३ नम्बरको मोटरसाइकल सडकमै रोकी जंगलतर्फ भागेका थिए।
उक्त मोटरसाइकलका चालक धनकुटा नगरपालिका–९ निवासी २१ वर्षीय लक्ष्मण माझीलाई नियन्त्रणमा लिएर सोधपुछ गर्दा उनले लागू औषध रहेको झोला जंगल क्षेत्रमा लुकाएको जानकारी दिएका थिए। त्यसपछि गरिएको खोजतलासका क्रममा मोटरसाइकलमा बोकेको कालो झोलाभित्र १८ पोका गाँजा, कुल तौल १९ केजी फेला परेको प्रहरी प्रमुख कुवरले बताए ।
बरामद लागू औषध, मोटरसाइकल र पक्राउ परेका व्यक्तिलाई ईलाका प्रहरी कार्यालय महेन्द्रनगरमा ल्याई थप अनुसन्धान भइरहेको प्रहरीले जनाएको छ।
