बेलका, उदयपुर – आर्थिक वर्ष २०८१/०८२ मा विनियोजित कार्यक्रम अन्तर्गत, करुणा फाउन्डेसन नेपाल, सामाजिक विकास मन्त्रालय विराटनगर र बेलका नगरपालिकाको त्रिपक्षीय लागत साझेदारीमा २२ जना अपाङ्गता भएका व्यक्तिहरुलाई सहायक सामग्री वितरण गरिएको छ।
उक्त कार्यक्रम बेलका नगरपालिकाका नगरप्रमुख अशोक कार्कीको अध्यक्षतामा सम्पन्न भयो। कार्यक्रममा नगर उप–प्रमुख जिरा राई, वडा नं. १ का वडा अध्यक्ष दिनेश्वर प्रसाद चौधरी, ५ का वडा अध्यक्ष दिपकराज रेग्मी र कार्यपालिका सदस्य राजेन्द्र परियारको उपस्थिति रहेको थियो।
कार्यक्रम अन्तर्गत विभिन्न अपाङ्गता भएका नागरिकहरूलाई ह्विलचेयर, क्रच, ट्राइसाइकललगायतका सहायक सामग्री प्रदान गरिएको हो। सहभागी वक्ताहरूले कार्यक्रमले अपाङ्गता भएका व्यक्तिहरुको जीवनयापनमा सहजता ल्याउने र उनीहरूलाई आत्मनिर्भर बनाउने दिशामा सकारात्मक योगदान पुर्याउने अपेक्षा व्यक्त गरे।
करुणा फाउन्डेसन नेपालले अपाङ्गता भएका समुदायको सशक्तीकरण तथा समावेशी विकासका लागि निरन्तर क्रियाशील भूमिका खेल्दै आएको छ भने बेलका नगरपालिकाले यस किसिमका सामाजिक उत्तरदायित्वका कार्यक्रमलाई प्राथमिकतामा राख्दै आएको जनाइएको छ।
