कोशी प्रदेश डजबल संघको तदर्थ समिति गठन, संयोजकमा थानेश्वर ढकाल
विराटनगर – कोशी प्रदेशमा डजबल खेलको प्रवर्द्धन, संगठनात्मक विस्तार तथा संस्थागत विकासलाई थप प्रभावकारी बनाउने उद्देश्यसहित १३ सदस्यीय कोशी प्रदेश डजबल संघको तदर्थ समिति गठन गरिएको छ।
सुनसरी प्याब्सनका अध्यक्ष तथा इटहरीस्थित मकालु इङ्लिस बोर्डिङ स्कुलका प्रिन्सिपल थानेश्वर ढकालको संयोजकत्वमा गठन गरिएको समितिमा जनार्दन मैनाली र काजी बहादुर कार्की उपाध्यक्ष, गोपाल निरौला सचिव, प्रकाश श्रेष्ठ कोषाध्यक्ष तथा खगेन्द्र पोखरेल, छिरिङ भोटे, खिलकुमार सुवेदी, प्रेम सुब्बा, भवानीप्रसाद पाठक, विवश प्रधान, रमीला नेपाली र केबलमणि रिजाल सदस्यका रूपमा चयन भएका छन्।
संयोजक ढकालका अनुसार समितिले विद्यालय, जिल्ला र प्रदेश स्तरसम्म डजबल खेलको संरचना विस्तार गर्दै यसलाई राष्ट्रिय तथा अन्तर्राष्ट्रिय स्तरमा प्रतिस्पर्धी बनाउने उद्देश्य लिएको छ। खेलकुदको माध्यमबाट विद्यार्थीको सर्वाङ्गीण विकास र समावेशी सहभागितालाई प्राथमिकता दिने लक्ष्य पनि समितिले लिएको छ।
तदर्थ समितिलाई आगामी तीन महिनाभित्र अधिवेशन सम्पन्न गरी पूर्ण कार्यसमिति निर्माण गर्ने जिम्मेवारी दिइएको छ।
